Preto da fronteira con Huelva, na marxe esquerda da desembocadura do Guadalquivir e fronte ao mesmo Parque Nacional de Doñana, atópase esta vila que comparte con Jerez a fama das bodegas. Non hai que deixar de probar a súa manzanilla nin de contemplar as súas carreiras ecuestres na praia. E é que esta vila conta con areais turísticos como os de Bajo de Guía, La Calzada, Las Piletas ou La Jara.

O seu trazado urbano provén da dominación musulmá e mantén a estrutura daquela época, estreitas rúas que van desembocar ao mar e o río. Entre os seus monumentos cóntase o castelo de Santiago do século XV, o palacio dos infantes de Orleans e Borbón, actualmente Casa do Concello ou o dos duques de Medina Sidonia, sede do arquivo municipal. Das súas obras relixiosas destacan a igrexa de Nosa Señora da O, e o convento de Santo Domingo, do século XVI.

A Ruta dos Pueblos Blancos consta de dezanove vilas moi pintorescas, distinguidas polas súas pequenas casas brancas. É un itinerario moi recomendábel para gozar de arquitectura serrá andaluza nun entorno de sol, sosego e deliciosa gastronomía. 

O punto de partida desde Jerez cara o leste está en Arcos de la Frontera, fermosa vila asentada sobre unha pena avermellada sobre o río Guadalete. Este privilexiado asentamento ofrece fermosas vistas sobre a serra. Os seus recunchos fan gala dunha construción típica andaluza con forte herdanza árabe. A zona antiga de enmarañadas e encaladas calexas, fachadas barrocas e renacentistas adornadas con escudos e flores, conforma unha fermosa estampa que perpetúan vilas  gaditanas como Bornos, Setenil, Grazalema, Zahara de la Sierra e outros malagueños como Ronda.

De orixe fenicia, esta capital de provincia situada nunha península conserva un importante legado como histórico porto atlántico. Puerta Tierra marca a liña imaxinaria entre a Cádiz tradicional e a moderna. Como monumentos máis importantes érguense a Catedral coa súa cúpula de azulexos amarelos, o antigo teatro romano e a catedral vella. Testemuños da historia democrática son o Monumento ás Cortes Liberais ou o Oratorio de San Felipe Neri, Monumento Nacional no que se debateu a Constitución liberal de 1812.

A capital móvese en prazas cheas de vida como a de San Juan de Dios onde se levanta a estrutura neoclásica da Casa do Concello, a do Tío de la Tiza ou o Mercado Central. As mellores vistas do mar ofrécenas paseos como o da Alameda da Apodaca, o Parque Xenovés e a praia da Caleta. Non hai que esquecer construcións relixiosas como a igrexa de Santa María e o Convento de Santo Domingo, a parroquia da Palma ou a do Carmen, nin tampouco museos como o Arqueolóxico e de Belas Artes ou o Museo Histórico Municipal.