A ruta comeza ao sur en Lloret de Mar, un importante centro turístico que conserva as primeiras mostras de patrimonio, en recunchos como o poboado ibérico do Puig de Castellet, os románticos xardíns de Santa Clotilde, o castelo, a ermida de Sant Quirze do século XI e algunhas casas de indianos. Desde esta localidade á seguinte xa poden gozarse algunhas das mellores calas da Costa Brava.

Tossa de Mar é outra das localidades máis carismáticas e fermosas da comarca. Esta vila de orixe romana estivo historicamente ligada ao Mosteiro de Ripoll. A súa zona medieval amurallada, a Vila Vella, é toda unha delicia para o paseante, con torres cilíndricas que aínda se conservan. Outros monumentos a destacar son a torre de Roanas, a igrexa de Tossa, ou o Palacio do Gobernador. Tampouco hai que se esquecer de admirar a gótica Casa Can Vicenc, a capela de Sant Miquel ou visitar o seu Museo Municipal, reflexo do movemento artístico que albergou nos anos trinta.

A seguinte localidade é Sant Feliu de Guixols, outra fermosa vila turística inserta nun contexto de natureza escarpada. A súa mestura de abrupta vivacidade e a pegada do seu pasado confírenlle unha esencia moi especial. Á marxe das súas praias, o seu maior monumento é o maxestoso mosteiro románico de Sant Peres de Rodes. O edificio actual parte da base do convento do século X, rematando esta remodelación no século XIII. Outros puntos de interese son o seu Museo Municipal, as súas torres, o Mercado Cubierto ou o Arco de Sant Benet, sen esquecer o paseo marítimo.

O seguinte núcleo en destacar é o formado polo Castillo e Platja d’Aro. O seu fino areal representa un dos centros de ocio máis importante da costa, tanto polo número de bañistas nas horas de sol como nas escapadas nocturnas de residentes e visitantes. Un fenómeno que se explica tamén polo enreixado de aloxamentos, tendas, bares, terrazas e discotecas que rodean a praia. Castell d’Aro, ofrece o contrapunto, a imaxe medieval e cultural que non se dobrega ante a explosión turística.

Tras visitar as ruínas helénicas de L’Escala, haberá que percorrer un amplo tramo ata chegar ao próximo saliente da costa, en cuxo comezo está Roses, antiga colonia grega a cabalo entre mar e montaña. Son multitude as praias, calas e rochosos acantilados dos seus arredores, aptos para os máis variados deportes náuticos. Outros valores naturais son os dos parques de Aiguamolls de l´Empordá e Cap de Creus, mentres que os históricos se circunscriben ao conxunto da Ciudadela, antigo conxunto defensivo renacentista.

A última localidade emblemática deste litoral é Cadaqués, situada ao norte, na península do Cabo de Creus. En torno ao Parque Natural do mesmo nome pódese gozar de incríbeis paisaxes de paradisíacas praias e calas retiradas. Ao fondo da súa baía asoma unha zona histórica mariñeira que inspirou a artistas ao longo da historia, polo que son numerosos os seus museos e galerías, en especial a Casa-Museo de Salvador Dalí. Un broche cultural a este paseo por encantadoras localidades ao borde do acantilado e praias de bandeiras azuis.