O percorrido da Costa Blanca comeza ao norte na localidade de Denia. Estreitas rúas mariñeiras e típicas vivendas brancas de tella vermella conforman unha encantadora paisaxe urbana, especialmente no popular barrio dos pescadores. Edificios dignos de ver son o seu castelo musulmán, a casa do concello con restos romanos e a igrexa da Asunción. Salienta tamén o seu entorno natural conformado por praias de area fina, paisaxes acantiladas e o parque natural do Montgó. 

Entre dous cabos sitúase Jávea, ideal para gozar dos deportes acuáticos. Ademais das súas praias hai que apreciar trazos de arquitectura local na súa zona antiga, aos pés do macizo do Montgó. Monumentos insignes son a igrexa fortaleza de San Bartolomé, edificio do gótico isabelino que protexía á vila dos piratas ou a igrexa da Nosa Señora de Loreto, en forma de quilla.

Ao acubillo da Pena de Ifach, Calpe atraeu a diferentes civilizacións que deixaron restos como os Baños de la Reina, antiga factoría de salgaduras romana. Este capricho xeolóxico e os seus arredores están declarados parque natural, pola súa riqueza botánica e faunística. Nun paseo pola súa zona urbana amurallada, hai que visitar o templo gótico-mudéxar da Virxe das Neves.

Ao amparo das montañas está tamén Altea, de branca estampa coroada pola cúpula azul do templo da Virxe do Consolo. Desde a praza no alto da vila obtéñense estupendas panorámicas da comarca. Na parte baixa está a rúa comercial, o barrio dos pescadores e o porto, aínda hoxe cunha intensa actividade pesqueira. Os seus seis quilómetros de praia e paseo marítimo redondean unha proposta máxica e tranquila. 

Benidorm é sinónimo de verán. Unha cidade lúdica que ofrece praceres como percorrer o paseo marítimo, gozar do baño, practicar deportes náuticos ou realizar unha excursión en barco á súa illa. O estupendo clima todo o ano, xunto á alta calidade dos seus servizos deulle a fama. O seu tesouro sen dúbida as fermosas e urbanas praias de Levante e de Poniente ou a cala de Mal Pas, preto da zona antiga. 

No centro histórico hai xoias como a igrexa de San Jaime, cuxas bóvedas azuis se alzan entre o conxunto. Flanqueando a zona antiga, amplas avenidas comerciais describen o Benidorm actual. Aquí, numerosos complexos hoteleiros, restaurantes e terrazas farán a estancia agradábel, sen esquecer o parque temático Terra Mítica.

Seguindo cara o sur están Villajoyosa e El Campello, ambas localidades tranquilas e idóneas para a práctica de deportes náuticos. Villajoyosa destaca polas súas coloridas casas mariñeiras.

A cidade de Alacant sempre foi un importante porto comercial. A capital está presidida polo monte Benacantil e a fortaleza de Santa Bárbara que permite escrutar desde os seus muros todos os arredores. Na súa zona antiga chama a atención a igrexa gótica de Santa María, levantada sobre unha mesquita. En fronte atópase o Museo Casa de la Asegurada, onde caben Miró, Picasso ou Chillida. Outro museo que merece a pena é o Arqueolóxico Provincial, que expón os restos do xacemento do Tossal de Manises.

No barrio vello hai que salientar o conxunto formado pola praza da Casa do Concello, con fachada barroca, o colexio da Compañía de Jesús e a concatedral de San Nicolás. O seu gran tesouro natural é a liña de costa e o maior lugar de esparexemento é o paseo da Explanada de España, cheo de terrazas. Sen esquecer a praia urbana de El Postiguet, onde alacantinos e visitantes gozan do sol e o mar. Entre as súas festividades destacan a de Mouros e Cristiáns ou a máxica Noite de San Xoán, coas súas fogueiras.

Continuando a franxa, hai que pararse en Santa Pola, antigo castro ibero e importante núcleo pesqueiro, enmarcado nunha paisaxe de gran riqueza ambiental.

Torrevieja é outra das máis turísticas localidades da Costa Blanca. A súas dúas enormes salinas foron declaradas parque natural e están rodeadas de modernas urbanizacións. Pero non só do turismo vive a cidade, de feito a súa sal expórtase ao mundo enteiro. Tamén conserva unha forte tradición mariñeira, expresada nas súas habaneras.

Seguindo ao sur atópase o litoral pertencente ao municipio de interior de Orihuela, con areais e acantilados aptos para a pesca e o mergullo. A súa cidade monumental combina mostras do gótico, renacemento e barroco, mentres que nas súas devesas se dispoñen complexos para a práctica do golf.

E é que o interior da provincia ofrece unha imaxe diferente, entre altas montañas, campos de cultivo e bosques. As poboacións que salpican estas terras destacan por un carácter máis rústico e sobre todo pola súa variedade. Hai que resaltar Elche, co palmeiral máis extenso de Europa, cuxas festas do Misterio han de ser vividas; Jijona, mundialmente famosa polos seus turróns; e Alcoy, onde se forma o río Serpis, que determina o seu centro medieval.