Mallorca é un destino estival de primeira orde, no que luce o sol case todo o ano e perfectamente comunicado coas principais capitais do continente. Este recuncho do Mediterráneo atrae cada tempada a millóns de persoas que se deixan seducir pola beleza dos seus 550 quilómetros de costa.

Pero se ben calquera época é ideal para visitar Mallorca, que mellor ocasión que as primeiras semanas de verán, para gozar do seu radiante sol e as súas limpas praias e calas. E é que a maior das Illas Baleares luce orgullosa algúns dos máis fermosos areais do Mediterráneo. Ocres ou brancos, revestidos de vexetación ou flanqueadas por acantilados, estas paisaxes de mar teñen un claro efecto terapéutico en quen as transitan.

Tradicionalmente a praia se considerou un destino estival para desconectar e relaxarse. En definitiva, liberarse das ataduras do estrés cotiá e sentirse ben. Factores como a brisa mariña, o clima agradábel ou os baños contribúen a este estado de serenidade. Para que a experiencia sexa aínda máis revitalizante cómpre visitar os múltiples centros de beleza e spa que Mallorca ofrece, sempre en mans de profesionais. 

Estes centros é fácil atopalos en torno ás zonas costeiras e obran milagres para desfacerse da tensión acumulada durante todo o ano. Os seus tratamentos descubrirán unha dimensión da auga diferente e complementaria á experimentada a pé de praia. Tampouco hai que se esquecer dos programas máis orientados á estética e beleza, xa que a comezo de verán interesa estar en plenas facultades para gozar por todo o alto do resto de vacacións.

Unha das praias máis recomendábeis para o relax é a de Muro, caracterizada pola súa limpeza e o seu estado salvaxe. Esta praia de area branca e fina ocupa cinco quilómetros dun litoral de tranquila ondada e augas pouco profundas. Dispón dun entorno dunar con vexetación baixa onde tan só cabe buscar o acubillo dos piñeirais, cuxa sombra convida ao visitante a comer e botar a sesta.

Á súa vez intégrase dentro da baía de Alcudia, que alterna zonas virxes con outras urbanizadas e centros turísticos integrados na paisaxe de forma non agresiva. Conta cunha albufeira declarada Parque Natural, que serve de hábitat para a flora e fauna autóctona. Na paisaxe desta poboación indicada para perderse, tamén salientan as siluetas dos seus muíños de vento.

Á marxe da multitude de centros de Spa de diversas características, hai que salientar as instalacións do Balneario San Juan de la Font Santa. Na tranquila e illada vila de Campos atópase este complexo termal a 45 km. da capital pero a escasos 3 quilómetros do mar. A paz que brinda o seu entorno establece un máis que interesante contraste co bulicio das praias mallorquinas en verán.

As súas augas cloruradas, radiactivas e sódicas están indicadas para tratar afeccións do aparello respiratorio, neurolóxicas, da pel, traumatoloxía e reumatismos. Porén, calquera pode gozar da tonificación que ofrecen os seus baños-masaxes de burbullas, baños termais, duchas e inhalacións. Ademais das súas instalacións hai que salientar o edificio decimonónico de estilo mallorquino e un entorno natural con salinas e piñeiros bordeando dunas en torno a unha enorme praia salvaxe.

Outro hotel entregado ao relax atópase en Llucmajor, 25 quilómetros ao sur de Palma de Mallorca. Trátase do Mallorca Marriott Son Anten, que aínda que se distingue por unha proposta orientada ao golf, tamén sobresae polo seu servizo de jacuzzi, sauna e Spa.