O Festival de Teatro Clásico de Almagro involucra toda a cidade, que se converte ao longo de practicamente un mes en vaporosa bambolina. O evento, cun prestixio e recoñecemento internacional, comezou o pasado 20 de xuño e aínda lle quedan moitos pratos fortes antes da súa clausura. Soan en Almagro ecos do enxeño de Shakespeare, Tirso de Molina, Calderón de la Barca, Lope de Vega ou Fernando de Rojas, entre outros moitos autores.

Aínda se pode gozar das “Tonadillas escénicas de Los Zagales” ou “El Pozo” de Pablo Esteve ou “La lección de música y bolero” de Blas Laserna no Corral de las Comedias o 18 e 19 de xullo, así como da música en directo de María João Pires o día 20.

Ata o día 20 poderanse descubrir as inquietudes de “El curioso impertinente” de Guillén Castro no Hospital de San Juan, ou gozar dun relato de perpetua actualidade como “La Celestina” de Fernando de Rojas, os días 18 e 19 de xullo no Teatro Municipal. O Patio de Fúcares acollerá “Los enredos de Scapín” de Moliére desde o 18 ao 20 de xullo, mentres que “Life is a dream”, A vida é soño, de Calderón de la Barca atopa escena o 19 de xullo na Igrexa de las Bernardas. “La mujer por fuerza” de Tirso de Molina representarase ata o 20 de xullo en La casa de los Miradores e o inmortal “Hamlet” na antiga Universidade Renacentista de Almagro ata o 19 de xullo. E estas non son as únicas obras que aínda se poden gozar no festival deste ano, que cumpre a súa 31 edición.

Pero é tan importante o contido como o continente neste consagrado festival. Os visitantes non perden a ocasión de gozar dos encantos da localidade.

Inmerso na Ruta de El Quijote, Almagro é unha encantadora localidade perfectamente comunicada, a través do aeroporto nas súas inmediacións, e o tren de alta velocidade que conecta nunha hora con Madrid e Sevilla. A localidade é pequena, pero conta cun sector hoteleiro e de restauración perfectamente preparado para acoller a ondada de visitantes que por estas datas se dan cita na cidade. Os comercios, abandeirados polas tendas de encaixe e produtos artesanais, de viños e aceites da rexión, farán as delicias dos máis selectos consumidores.

Almagro, capital do Campo de Calatrava, estivo moi unida a esta orde relixiosa, de gran relevancia política durante a Baixa Idade Media. Banqueiros do emperador Carlos V, como os Fugger e os Welser, asentáronse nestas terras, o que contribuíu ao desenvolvemento de Almagro.  Como ocorre en case todas as localidades castelás, o centro neurálxico de Almagro é a Plaza Mayor, construción de planta rectangular rodeada por soportais de pedra e balcóns de madeira de dúas alturas. Aquí se enclavan os monumentos civís máis emblemáticos da localidade, como o Corral de Comedias, o Museo Nacional do Teatro e a Casa do Concello.

O Corral de Comedias, declarado Monumento Nacional, data do século XVI e é o lugar clásico onde se representaban as obras teatrais durante o Século de Ouro español. Hoxe en día perpetúa a súa tradición como gran escenario do teatro, sendo un dos principais do Festival Clásico de Almagro. No seu interior, pódense visitar as galerías, o escenario e os vestiarios.

O Hospital de San Juan, o Teatro Municipal, o Patio de los Fúcares, e o Claustro de los Dominicos súmanse aos escenarios rueiros que durante preto dun mes transportan a Almagro á época de Lope de Vega, Tirso de Molina ou Calderón de la Barca.

Unha típica casona manchega é a sede do Museo Nacional do Teatro, que conta con interesantes fondos dedicados á escenografía, traxes teatrais do século XVIII, maquetas de teatros e teatríns, ademais dun completo arquivo pictórico e musical.

O Barrio Noble trasladará o visitante a épocas de prosperidade señorial. Nel pódense admirar as casas brasonadas do Mayorazgo de los Molina, de los Rosales, a Casa del Prior ou a do Capellán de las Bernardas. A arquitectura palacega manchega atópase fielmente representada nos palacios do Maestral, dos Marqueses de Torremejía ou o Palacio dos Condes de Valparaíso.

Almagro conta con templos de gran valor arquitectónico, como son as igrexas de San Bartolomé, San Agustín (declarada de Interese Cultural), ou Madre de Dios. Os conventos da Encarnación e da Asunción de Calatrava (Monumento Histórico-Artístico) son testemuños vivos da importancia do estamento eclesiástico que se asentou na cidade.

Na zona do Campo de Calatrava aséntanse castelos, palacios e localidades de gran importancia histórico-artística como El Viso del Marqués, Almuradiel ou Calzada de Calatrava. En Campo de Montiel, atópanse os restos medievais de Montiel, e localidades de gran interese como Villanueva de los Infantes e Villamanrique.

Desde Almagro, o visitante ten fácil acceso á paisaxe de lagoas e illotes do Parque Nacional de las Tablas de Daimiel ou ao Parque Natural de Las Lagunas de Ruidera, unha zona húmida de gran importancia ecolóxica e paisaxística.

Tras o intenso percorrido turístico, os balnearios de Fuencaliente e Santa Cruz de Mudela poñen a disposición do exhausto visitante as súas excelentes instalacións termais para un merecido descanso.