Son varios os milagres que se lle atribúen a Santo Isidro Labrador, entre os máis notábeis figura o do pozo, no que a súa oración fixo elevar as augas dun pozo onde caera o seu fillo, posteriormente coñecido como Santo Illán. Cabería atribuírlle a Santo Isidro outro mérito, tan terreal como divino: o de unir nunha soa voz os millóns de madrileños en cada un dos seus distritos que cada ano se congregan en torno á súa figura. 

Fieis á tradición os chulapos e as chulapas madrileños ultiman hoxe os detalles, empezando pola súa rexional e característica vestimenta, para celebrar con plena magnitude o día grande do patrón como cada 15 de maio, efeméride da defunción do seu venerado santo, quen faleceu ese mesmo día no ano 1130. O día grande iníciase cunha romaría, procesión do Santo e coa tradición de beber auga do pozo onde Santo Isidro obrou un milagre.

Non cabe dor máis alá das sinceras bágoas de devoción nos festexos de Santo Isidro. A festa apodérase das rúas de Madrid, porque ¿quen non desexaría ser recordado cun sorriso?.

A Feira de San Isidro é unha cita raíña para os amantes da arte de "Cúchares". Un ambicioso cartel colga da praza de Las Ventas, con figuras de arte e de gala que farán as delicias da bancada. Non hai mansos para os destros, senón bravíos touros das mellores gandarías que venderán cara a súa vida ante os toureiros de primeira liña que pisarán a area de Las Ventas. O cartel da feira da tauromaquia por excelencia comeza o día 8 de maio e culmina o día 31. 

O día grande de San Isidro serán os toureiros El Cid e Alejandro Talavante os encargados de demostrar a súa arte, nunha cita esperadísima polos afeccionados. Un día despois, o 16 de maio, touros de Marqués Domecq porán a proba o tempero de Rafaelillo, Iván Vicente e Javier Valverde. O sábado 17 será a quenda para os toureiros dacabalo Joao Moura, Pablo Hermoso e Andy Cartagena. O domingo 18, Luis F. Esplá, Pepín Liria e Serranito terán a oportunidade de saír a ombros pola porta grande. 

No extenso cartel, que abrangue un total de 23 corridas dentro de abono, brillan os nomes de destros entregados á súa arte, como son El Juli- os días 23 e 27 de maio, ademais do 3 de xuño na Feira Aniversario- ou Miguel Abellán, quen comparte cartel con El Juli o día 27 e pisará a area tamén como cabeza de cartel xunto a Matías Tejela o 8 de xuño.

Os sons da tradicional zarzuela da Praza Maior non son os únicos sons que poden escoitarse nos San Isidros madrileños. Nun esforzo por conciliar tradición e modernidade, por unir a todas as xeracións en torno á celebración, un calendario de concertos nocturnos desafiarán os pés máis cansos. 

O Palacio de Congresos e Exposicións abre as súas postas o día 14 para acoller o flamenco con olor a verán de "El Bicho". No Club de Campo Villa de Madrid, durante a totalidade das xornadas festivas, poderá gozarse de concertos de música clásica e de jazz, de 11.30 a 14.30 horas e de 17.30 a 22 horas.

Zarzuelas cómicas no Centro Cultural Galileo, espectáculos de monicreques en El Retiro, cocido madrileño o domingo da man de Aldeas Infantiles, teatro, IV Ciclo de Bandas de Música no parque Peñuelas, a celebración do Día Internacional dos Museos o domingo 18... son só uns exemplos azarosos dentro da extensa programación que ofrecen as festividades de San Isidro en Madrid. Unha oferta ampla e distinta para contentar todos os gustos, todos as idades, todos os soños e todas as motivacións.